جۆیس کارۆل ئۆتس: بەخشینی خەڵاتی نۆبێڵ بە بۆب دیلان هەڵبژاردەیەکی هەژێنەر بوو

جۆیس کارۆل ئۆتس

وەرگێڕانی هەژار عوسمان

جۆیس کارۆل ئۆتس، ڕۆماننووس و چیرۆکنووس و وتارنووسی بەناوبانگی ئەمەریکا و جیهان، ماوەی چەند ساڵێکە لەسەریەک ناوی لە لیستی ئەو ناوانەدا دێن کە دەشێ هەڵببژێرێن بۆ وەرگرتنی خەڵاتی نۆبێڵی ئەدەبیات. ئەگەرچی بەختی وەرگرتنی خەڵاتەکەی لە بیست کەسی یەکەمدا؛ بیستەم بوو.

بەڵام ئەمساڵ لە جیاتیی ئەو، کۆمیتەی هەڵبژاردنی خەڵاتی نۆبێڵی ئەدەبیات بۆ ساڵی ٢٠١٦، خەڵاتەکەی بەخشییە ''بۆب دیلان''ـی هاونیشتمانیی ئۆتس، ''لە بەرانبەر هێنانەئارا و خولقاندی گوازرشتێکی شاعیرانەی نوێ لە گۆرانیی باوی ئەمەریکاییدا.''

تاکە پەیوەندی لەنێوان ئۆتس و دیلاندا ئەوەیە کە گۆرانیی ''ئازیزی غەمگین، ئێستا ئیتر هەموو شت کۆتایی هات'' لە یەکێک لە چیرۆکەکانی ''ئۆتس''ـەوە بە ناوی ''بۆ کوێ دەڕۆیت، لە کوێ بوویت؟'' وەرگیراوە. سەرەڕای ئەوەی ئۆتس بە ڕۆژنامەی ''وۆڵ ستریت جێرناڵ''ـی گوتووە کە ئەو کاریگەرییە ناڕاستەوخۆیە.

ئەمەی خوارەوە وەڵامی ''ئۆتس''ـە لە بەرانبەر نۆبێڵەکەی ''دیلان''ـدا:

هەڵبژاردەکەی کۆمیتەی خەڵاتی نۆبێڵ هەژێنەر بوو. زۆرێک لە ئێمە (ڕاستیەکەی زۆرینەمان) میوزیک و گۆرانییەکانی ساڵانی ١٩٦٠ـەکانی دیلان لەناو گیان و دەروونماندایە- بە تایبەت لیریکە سوریال و مۆنۆلۆگییە دراماتیکییە بەهێزەکانی وەکوو؛ (''ئازیزی غەمگین، ئێستا ئیتر هەموو شت کۆتایی هات'' و ''لەگەڵ خوا لە بەرەی ئێمەدا'' و ''فووکردن لە هەوادا'' و ''وەکوو جێبەخۆنەگرێک''). من بڕوام وایە، خەڵاتەکەی دیلان چەند ساڵێکە بۆی دانراوە و حازر کراوە- ئەوە ماوەی دە ساڵێکە بە جددی ناوی دەهێنرێ بۆ وەرگرتنی خەڵاتەکە، بۆیە پێم وا نییە بەخشینی خەڵاتەکە بەو شتێکی هێندەش داچڵەکێن بێ.

بەهەرحاڵ، بەخشینی خەڵاتەکە بە یەکێک لەو ئەندامانەی گرووپی میوزیکی بیتڵس کە هێشتا لە ژیاندا ماوە لە هەمان کاتدا هەم هەڵبژاردەیەکی هەژێنەر و هەمیش خرۆشێنەر دەبوو. لەڕاستیدا ئەگەرچی قسەش هەڵدەگرێ بەڵام میوزیکی ئەوان (بیتڵس) هێندەی ئیشەکانی بۆب دیلان گرنگە، یان ڕاستییەکەی زیاتریش گرنگە.

جۆیس دەڵێ:

هیوادارین کە بۆب دیلان بتوانێ ئەو دەرفەتە بقۆزێتەوە هەتا شتێکی سیاسیانە بڵێ. لەم کاتە کەسبەکەسەدا کاتێک دیموکراسی بۆ خۆی وا دیارە لەژێر مەترسییدایە و بێدەستە، زۆر گرنگە هونەرمەندەکان و نووسەرەکان زۆر بە ڕوونی ڕاستگۆیی و ڕاشکاوانە قسەی خۆیان بکەن. ئەگەرچی بە دڵنیایییەوە لەوەش تێدەگەم کە بۆب دیلان بیەوێ هەر وا خۆی لە سیاسەت بە دوور بگرێ و هیچیش نەڵێ.

سەرچاوە: وۆڵ ستریت جۆرناڵ